பள்ளிகள் திறப்புக்கு பின் வகுப்புகள் எப்படி நடக்கும்: தமிழக அரசு முடிவு.

பள்ளிகள் திறப்புக்கு பின் வகுப்புகள் எப்படி நடக்கும்: தமிழக அரசு முடிவு.

பள்ளிகள் திறப்புக்கு பின்னர் வகுப்புகளை நடத்துவது தொடர்பான பள்ளி கல்வித்துறை அமைச்சர் செங்கோட்டையன் முக்கிய அறிவிப்பு ஒன்றை வெளியிட்டுள்ளார். கொரோனா பரவலை கட்டுக்குள் கொண்டு வரும் நடவடிக்கையாக கடந்த மார்ச் மாதம் முதல் தமிழகம் முழுவதும் பள்ளி, கல்லூரிகள் உள்ளிட்ட கல்வி நிறுவனங்கள் மூடப்பட்டுள்ளன. பொது முடக்கம் மட்டும் கொரோனாவுக்கு தீர்வு இல்லை என சர்வதேச மருத்துவர்கள் கூறிவரும் நிலையில் மத்திய, மாநில அரசுகள் பல்வேறு தளர்வுகளை அறிவித்து வருகின்றன. இருப்பினும், பள்ளி, கல்லூரிகள் திறப்பிற்கான தடை வருகிற 30ஆம் தேதி வரை தொடரும் என தெரிவிக்கப்பட்டுள்ளது. 

எனவே, பள்ளிகள், கல்லூரிகள் திறப்பு எப்போது என்பது தொடர்ந்து எழுப்பப்படும் கேள்வியாக உள்ளது. இதனிடையே, செப்டம்பர் 21ஆம் தேதி முதல் 9ஆம் வகுப்பு முதல் 12ஆம் வகுப்பு மாணவர்கள் மட்டும் தங்கள் சுய விருப்பத்தின் பேரில் பள்ளிகளுக்குச் சென்று ஆசிரியர்களின் ஆலோசனைகளைப் பெறலாம் என மத்திய உள்துறை அமைச்சகம் அனுமதி அளித்துள்ளது. இதற்கான நிலையான செயல்பாட்டு வழிமுறைகளையும் உள்துறை அமைச்சகம் வெளியிட்டுள்ளது. இது நாடு முழுவதும் பள்ளிகள் திறப்பிற்கான முன்னோட்டமாக பார்க்கப்படுகிறது. அந்த வகையில், மாவட்ட வாரியாக பள்ளிக் கல்வித்துறை அதிகாரிகளுடன் ஆலோசனை நடத்தி வரும் தமிழக அரசும், அக்டோபர் 5ஆம் தேதி முதல் பள்ளிகளில் விருப்பத்தின் பேரில் மாணவர்களை அனுமதிப்பது தொடர்பாக பேசி வருவதாக தகவல்கள் வெளியாகியுள்ளன. 

முன்னதாக, பள்ளிகள் திறக்கப்படும்போது 6 முதல் 8 ஆம் வகுப்பு வரையிலான மாணவர்களுக்கு காலை ஷிஃப்டிலும், 9 வகுப்பு முதல் பிளஸ் 2 வரை படிக்கும் மாணவர்களுக்கு மாலை ஷிஃப்ட்டிலும் வகுப்புகளை நடத்தவும் பள்ளிக் கல்வித் துறை திட்டமிட்டுள்ளதாக தகவல்கள் வெளியாகியுள்ளன. இந்த நிலையில், பள்ளிகள் திறப்புக்கு பின் சுழற்சி முறையிலான வகுப்புகள், அதாவது ஷிஃப்ட் முறையில் வகுப்புகள் கிடையாது என்று பள்ளி கல்வித்துறை அமைச்சர் செங்கோட்டையன் தெரிவித்துள்ளார். அனைத்து வகுப்புகளும் ஒரே நேரத்தில் திறக்கப்படும் என விளக்கமளித்துள்ள அமைச்சர் செங்கோட்டையன், தனிமனித இடைவெளியை பின்பற்ற தேவையான வகுப்பறைகள் உள்ளதாகவும் தெரிவித்துள்ளார்.