Student Education Repository (மாணவர்கள் கல்விக் களஞ்சியம்): Blood Moon Lunar Eclipse March 3 2026 இரத்த நிலவு சந்திர கிரகணம் மார்ச் 3 2026.

Monday, February 23, 2026

Blood Moon Lunar Eclipse March 3 2026 இரத்த நிலவு சந்திர கிரகணம் மார்ச் 3 2026.

Blood Moon Lunar Eclipse March 3 2026 இரத்த நிலவு சந்திர கிரகணம் மார்ச் 3 2026.

2026-ன் முதல் முழு சந்திர கிரகணம்... வெறும் கண்களால் பார்க்கலாம்; எப்போது தெரியுமா?

இரவு வானின் கருமை நிறத்தில், பூமியின் நிழல் நிலவை மெல்ல மெல்ல ஆக்கிரமிக்கும் காட்சியை விட ஒரு சிறந்த அனுபவம் இருக்க முடியாது. அந்த அற்புதக் காட்சியை வழங்க வருகிறது மார்ச் 3-ஆம் தேதி நிகழவிருக்கும் முழு சந்திர கிரகணம். சூரியன் மற்றும் சந்திரனுக்கு இடையே பூமி சரியாக நேர்க்கோட்டில் வரும்போது, பூமியின் ராட்சத நிழல் நிலவின் மீது படர்வதை நாம் சந்திர கிரகணம் என்கிறோம். இது அறிவியல் பூர்வமாகப் பகுதி கிரகணம், முழு கிரகணம் எனப் பிரிக்கப்பட்டாலும், மார்ச் 3 அன்று நாம் காணப்போவது ஒரு 'முழுமையான' காட்சி.

சந்திர கிரகணத்தின் உச்சகட்டமே 'முழு சந்திர கிரகணம்' தான். நிலவு முழுமையாக பூமியின் அடர் நிழல் பகுதிக்குள் (Umbra) நுழையும்போது இது நிகழ்கிறது. மார்ச் 3 அன்று, இந்தியாவில் சந்திரன் உதயமாகும் போதே பூமியின் நிழலால் மறைக்கப்பட்ட நிலையில் தான் தோன்றும்.

இந்த நேரத்தில் நிலவு முற்றிலும் மறைந்து போய் இருட்டாகத் தெரியாது என்பதுதான் ஆச்சரியமான விஷயம். மாறாக, அது ஒரு வசீகரமான செப்பு நிறத்திலோ அல்லது அடர் சிவப்பு நிறத்திலோ ஜொலிக்கும். இதனாலேயே வானியலாளர்கள் இதனை 'பிளட் மூன்' (Blood Moon) அல்லது 'இரத்த நிலவு' என்றழைக்கிறார்கள்.

சூரிய ஒளியில் உள்ள நீல நிறத்தை பூமியின் வளிமண்டலம் சிதறடித்துவிட்டு (Rayleigh scattering), நீண்ட அலைநீளம் கொண்ட சிவப்பு நிறத்தை மட்டும் நிலவின் பக்கம் வளைத்து அனுப்புகிறது. அந்தச் சமயம் பூமியின் காற்றில் இருக்கும் தூசு மற்றும் மேகங்களைப் பொறுத்து நிலவின் சிவப்பு நிறம் இன்னும் அடர்த்தியாகத் தெரியும். பூமி நிலவை விட அளவில் பெரியது என்பதால், இந்த முழு கிரகண நிகழ்வு ஒரு மணி நேரத்திற்கும் மேலாக நீடிக்கும்.

பகுதி கிரகணத்திற்கும் முழு கிரகணத்திற்கும் என்ன வித்தியாசம்? வானில் நடக்கும் இந்த விளையாட்டை எளிதாகப் புரிந்து கொள்ளலாம். சூரியன், பூமி, சந்திரன் ஆகியவை துல்லியமாக நேர்க்கோட்டில் அமையாதபோது இது நடக்கும். நிலவின் ஒரு பகுதியை மட்டும் யாரோ கடித்தது போலக் கருப்பாகத் தெரியும். இதில் 'சிவப்பு நிறம்' தோன்றாது. முழு சந்திர கிரகணம்- நிலவின் 100% பரப்பும் பூமியின் நிழலுக்குள் வந்துவிடும். அப்போதுதான் அந்த மாயாஜாலச் சிவப்பு நிறம் தோன்றும்.

பாதுகாப்பாகப் பார்க்கலாமா? நிச்சயமாக, சூரிய கிரகணத்தைப் போலல்லாமல், சந்திர கிரகணத்தை நாம் எவ்விதப் பாதுகாப்பு உபகரணங்களும் இன்றி வெறும் கண்களால் தாராளமாகப் பார்க்கலாம். மார்ச் 3 அன்று இரவு வானைப் பார்க்கத் தயாராகுங்கள். பூமியின் நிழல் நிலவை எப்படிச் சிவப்பாக மாற்றுகிறது என்பதை ரசிக்க இது ஒரு பொன்னான வாய்ப்பு.